"Приидите, людие российстии, преславно и православно ублажим Преблагословенную и Пречистую Марию Деву, в Баре граде благодать Свою издревле выну явившую, православные люди Подольския земли от агарян и сарацын свободившую, православную веру в пленении латинстем сохранившую. К кому убо прибегнем, аще не к Тебе, Владычице! Кому принесем слезы и воздыхания, аще не к Тебе, Пресвятая Богородице! Не имамы бо иные помощи, не имамы иные надежды, разве Тебе, Небесная Царице, Дево Пречистая, лествица к небеси, святое вместилище Слова Божия, прибежище верным и избавление, достоянию Твоему помощь и защищение, скорбящим подательнице вечного радования, иноков богомудрых возведение к горнему царствию. Ты бо, яко имущая державу непобедимую, злую дерзость латинскую отмстила еси, верою имя Твое всехвальное призвавших отцев наших спасла еси и покрыла их святым омофором. Не отврати и ныне рабы Твоя тщи. Тя бо едину надежду имамы; избави люди Твоя присно и град и обитель, юже избрала еси Себе местом проявления благодати Твоея, и Подольскую землю, и вся православныя христианы от искушений, от пагубных, душевредных учений, от неверия, развращения и погибели вечныя, и от всякого лютого обстояния, и наветов врагов церкви Твоея православныя, и до ныне тайно и неустанно сеющих скверныя плевелы на доброй, от века православной ниве Подольской; аще бо не Ты предстояла молящи, кто бы избавил веру отцев наших от толиких бед, кто бы и нас сохранил до ныне свободных? Мы же преблагому Твоему заступлению о нас радующеся, благодарственно да восписуем Ти и да зовем Ти: радуйся, Невесто неневестная".