Пролог служебный. 1 ноября.
Месяца ноемвриа в первый день, память святых чудотворцев и безсребренников, Космы и Дамиана.
Сии святии бяху сынове жены некоторыя именем Федотии, христианыни сущи, иже от нея научены быша христианстей вере, и священным писменем. Святым же духом и врачевскую хитрость имуще, врачеваху не точию человеки, но и скоты, мзды никоея взимающе. Исцелиста и жену некую именем Пелагию, иже отай притекши ко святому Дамиану, принесе ему три яица, заклявши его именем Божиим взятии их. И се слышав святый Косма, запрети по умертвии не положити тело Дамианово близ его тела. Успе же первее святый Косма, и посем успе святый Дамиан. Помышляху же людие, где погребсти его: запрещения бо ради святаго Космы, не хотяху положити купно со святым Космою. И внезапу вельблуд притече, иже бяше возбесне от диавола, и врачевавыйся от святых, проглагола человеческим гласом, еже положити святаго Дамиана близ святаго Космы: занеже не мзды ради взял есть яицы, но клятвы, и имене ради Божия. И тако купно погребена быста.
В тойже день чудо святых безмездников, Космы и Дамиана.
Муж убо некий от мест Ферманских, изыде во время жатвы, жати своея нивы: от солнца же угорев, тече под дуб отдохнути, и ляже, и успе зело. Отверстым же сущым устом его, змия приползши, вниде во уста его, и вселися во чрево его: он же воспрянув не разуме бывшаго, и тек к ниве жати до вечера. Вечеру же бывшу, прииде в дом, и сотворше домашнии его яд, пред ним поставиша: и яде, и пи, и возлег на одре почити. Почивающу же ему, терзаше его змия внутрь: он же вопияше. Возбудившым же ся всем, обхождаху его, и не обретаху что бяше недуг. Он же гласом великим возопи: о святии Космо и Дамиане, помозите ми! Слышавше же слуги Христовы, Косма и Дамиан, усписта его зело: да имже путем вниде исперва злодей диавол змий, темже паки и изыдет изгнан. Изгонящу же ся ему от уст его, святыми Космою и Дамианом безмездниками, и видеша вси сущии ту людие от святых бываемая. И изшедшу змию до конца, абие возопи муж той глаголя: никтоже да возложит руки на змия, повелено бо ему ити в геенну огненную, идеже червь неусыпаяй. То ему глаголющу, невидим бысть змий, молбою святых безмездников.
