Пролог служебный. 13 ноября (26 ноября по новому стилю).
Кийждо, возлюбленнии, внидем в свою совесть, и помыслим прегрешения, и суд на ня возлагаем, да не когда со вселенною причтени будем. Страшно бо судище то, грозно и место, и истязания и страха полно есть: огненна река течет. Воспомянем глаголемое во Евангелии: ангел текущих, затворяема чертога, свещы угасающыя, сим влекущих в пещь огненную. И то помысли, аще котораго нас вещь тайна на среду изведена будет днесь пред всем народом, колико бы ся молил, дабы погибнул, или земля разселася с ним: и егда будут свидетели злии о тайне той. Что бо тогда приимем, егда при всей вселенней на среду принесутся, при таковом великом том позорищи, и знаемых и незнаемых нами, всем зрящым?
Ох мне, откуду вам исповем нужду ону страшную? От человеческого ли сумнения, или паче же подобает от страха Божия? Кии будем тогда, рцы ми, егда связани, зубы стрегчуще, в кромешную тму отгоними будем? Аще сия убо тако будущая, отпадение царства, болезнь, и яже от геенны присныя узы, тма внешняя, червь ядовитый, скрежет зубов, скорбь, туга огненны реки, пещи неугасимыя: и все собрав, и противупоставив, и собранное имение искорени, недуг бо той: да истое богатство взем, и лютыя сея нищеты избудеши вечнаго суда, и будущих причастишися. Или аще бо потщимся, и молимся прилежно, то простит нас Бог. Аще ли не просим от Него, ни сотворим тако ничтоже, то како быти нам прощеным? Или како исправити вещь жития спящу? ни сего бо света вещи есть обрести николиже, нежели паче духовныя спящему. От друга убо ничтоже когда взятии спящу, то како от Бога? Ни отцы сыном чести творят сонливым, множае паче Бог. Ни господие рабом терпят ленивым, како убо Бог?
Сего ради мало поскорбим ныне, да во веки веселимся. Обаче скорбным есть быти аще не зде, но онамо ждет нас скорбь. Почто убо не хощем зде скорбни быти, да тамо почием присно? Постонем убо мало, молю вы, и сетуем ныне, да тогда не восплачемся о злобе: сей быти, а онамо без конца скорбь. Поскорбим возлюбленнии, дондеже есть время: вельми же попецемся, да не речем яко богатый он. Аще кто ныне отпустил, той попекся о спасении своем, да тем подвигнемся ныне.
Богу нашему слава, ныне и присно, и во веки веков.
